តើអ្នកគួរតែធ្វើយ៉ាងណាដើម្បីឲ្យការទំនាក់ទំនងកាន់តែមានប្រសិទ្ធិភាព?
នៅពេលដែលអ្នកធ្វើការ ការទំនាក់ទំនងជាមួយថ្នាក់លើ មិត្តរួមការងារ និងបុគ្គលិកផ្សេងទៀតគឺពិតជាសំខាន់ខ្លាំងណាស់ មិនថាតែការងាររបស់អ្នកស្ថិតនៅក្នុងវិស័យនិងផ្នែកណានោះទេ ។ការមានជំនាញនៅក្នុងការទំនាក់ទំនងក៏ជាកត្តាមួយដែលអាចជម្រុញឲ្យអ្នកទទួលបាននូវភាពជោគជ័យនៅក្នុងការសម្ភាសទទួលបាននូវការពេញចិត្តពីថ្នាក់លើក៏ដូចជាជោគជ័យនៅក្នុងវិស័យការងារផងដែរ ។
ខាងក្រោមនេះគឺជាគន្លឹះមួយចំនួនដែលអាចគួរតែអនុវត្តន៍ដើម្បីឲ្យការទំនាក់ទំនងរបស់អ្នកកាន់តែមានប្រសិទ្ធិភាព ។
១ . យកចិត្តទុកដាក់នៅក្នុងការស្តាប់
ប្រសិនបើអ្នកចង់ឲ្យការទំនាក់ទំនងរបស់អ្នកទទួលាបាននូវប្រសិទ្ធិភាពខ្ពស់អ្នកចាំបាច់ត្រូវតែអភិវឌ្ឍន៍នូវជំនាញនៅក្នុងការស្តាប់របស់អ្នកឲ្យបានកាន់តែល្អប្រសើរជាមុនសិន។ ជាការពិតណាស់នៅពេលដែលអ្នកនិយាយអ្នកប្រាកដជារំពឹងឲ្យអ្នកដទៃយកចិត្តទុកដាក់ស្តាប់ហើយមែនទេ? រីឯអ្នកផ្សេងក៏ដូចគ្នាដែរពួកគេក៏រំពឹងថាអ្នកនឹងស្តាប់ពួកគេដោយយកចិត្តទុកដាក់វិញដែរ។ វាគឺជាសកម្មភាពនៃការឲ្យតម្លៃគ្នាទៅវិញទៅមក ។ គួរបញ្ជាក់ផងដែរថាគ្មានអ្នកណាម្នាក់ចង់ទំនាក់ទំនងជាមួយនឹងមនុស្សដែលខ្វល់ខ្វាយតែពីខ្លួនឯងនិយាយតែពីខ្លួនឯងនិងមិនឲ្យតម្លៃទៅលើអ្នកដទៃនោះទេ ។
២ កាយវិការដែលអ្នកសម្តែងចេញ
កាយវិការដែលអ្នកសម្តែងចេញរួមមានដូចជាក្រសែភ្នែក របៀបដែលអ្នកនិយាយទៅកាន់អ្នកដទៃ ការប្រើប្រាស់សម្លេង ឥរិយាបថ និង អាកប្បកិរិយាគឺសុទ្ធសឹងតែជះឥទ្ធិពលទៅលើការទំនាក់ទំនង ។ មនុស្សភាគច្រើននឹងវាយតម្លៃអ្នកទៅតាមកាយវិការដែលអ្នកបានសម្តែងចេញ ជាពិសេសនៅពេលដែលអ្នកទៅសម្ភាសការងារគណៈកម្មកាភាគច្រើននឹងសង្កេតមើលទៅលើកាយវិការរបស់អ្នក។ ពួកគេអាចដឹងថាអ្នកជាបុគ្គលប្រភេទណាដោយសង្កេតលើកាយវិការដែលអ្នកសម្តែងចេញនេះឯង ។ដូច្នេះហើយត្រូវតែមានការប្រុងប្រយ័ត្នជាមួយនឹងកាយវិការដែលអ្នកសំដែងចេញ ។
៣ . មានទំនុកចិត្តលើខ្លួនឯង
ការមានទំនុកចិត្តលើខ្លួនឯងពិតជាសំខាន់ណាស់នៅក្នុងការទំនាក់ទំនងជាមួយអ្នកដទៃ ។ ទំនុកចិត្តដែលអ្នកមាននឹងបង្ហាញប្រាប់អ្នកដទៃអ្នកថាអ្នកមានភាពជឿជាក់លើខ្លួនឯង លើពាក្យពេចន៍ដែលអ្នកនិយាយទៅកាន់ពួកគេ។ ម្យ៉ាងវិញទៀតវានឹងត្រូវបានស្តែងចេញតាមរយៈក្រសែភ្នែកដែលអ្នកសម្លឹងទៅកាន់អ្នកដទៃនិងភាពរួសរាយរ៉ាក់ទាក់របស់អ្នក ។
