ជាការពិតគ្មាននរណាម្នាក់ដែលអាចជៀសផុតពីបញ្ហា រឿងរ៉ាវ អារម្មណ៍ធុញថប់ ធុញទ្រាន់ ឬក្ដីតប់ប្រមល់ជាមួយនឹងអ្វីដែលបានកើតឡើងនោះទេ ប៉ុន្តែយើងគ្រប់គ្នាគឺត្រូវតែបើកចិត្តទ្រាំទទួលយកវា និងត្រូវធ្វើវា ព្រោះនេះគឺជាកាតព្វកិច្ចរបស់យើង។ ហើយអ្នកក៏ដឹងដែរថា ប្រភពនៃស្រ្តេស និង អារម្មណ៍មួម៉ៅទាំងនោះកើតឡើងគឺដោយសារតែ អ្នកមានទំនួលខុសត្រូវដែលត្រូវរ៉ាប់រងច្រើនពេក ដូចជាត្រូវបំពេញកិច្ចការសាលាផង កិច្ចការស្រាវជ្រាវផង កិច្ចការងារនៅផ្ទះផង ទទួលរងនូវក្ដីសោកសង្រេងពីខាងក្រៅផង អាក់អន់ចិត្តជាមួយនឹងមនុស្សជុំវិញខ្លួនផង និងត្រូវទទួលខុសត្រូវចំពោះគ្រួសារទាំងមូល ក៏ដូចជាគិតគូររឿងថ្លៃជីវភាពរស់នៅប្រចាំថ្ងៃជាដើម។ ទាំងអស់នោះហើយគឺជាដើមហេតុដែលធ្វើឲ្យអ្នកស្ត្រេស និងស្មុគស្មាញខួរក្បាល ប៉ុន្តែអ្នកក៏អាចកាត់បន្ថយវាបានខ្លះៗដែរ បើសិនជាអ្នកអាចអនុវត្តន៍៤ចំណុចខាងក្រោមនេះ៖
១. ត្រូវមានតុល្យភាពនៃទំនួលខុសត្រូវ
អ្នកគួរតែបង្កើតនូវតុល្យភាពរវាងកិច្ចការដែលត្រូវធ្វើឬត្រូវបញ្ជប់ និង ភាពរីករាយដែលយើងត្រូវសប្បាយឲ្យដាច់ពីគ្នា ព្រោះបើអ្នកគិតតែពីរៀន គិតតែពីធ្វើការគ្មានថ្ងៃសម្រាក នោះអ្នកនឹងទទួលរងនូវផលប៉ះពាល់ជាច្រើនដល់សុខភាពរបស់អ្នក ប៉ុន្តែបើសិនជាអ្នកគិតតែពីការសប្បាយរីករាយ គិតតែពីការដើរលំហែ នោះចំណេះដឹងរបស់អ្នកក៏មិនអាចរីកចម្រើនទៅមុខដែរ។ដូចនេះអ្នកត្រូវធ្វើវាឲ្យស្មើភាពគ្នា ដើម្បីកុំឲ្យស្មុគស្មាញក្នុងចិត្តច្រើន។
២. ញ៉ាំអាហារដែលមានផាសុកភាព
អាហារគឺជារឿងមួយដ៏សំខាន់សម្រាប់សុខភាពផ្លូវកាយនិងសុខភាពផ្លូវចិត្តរបស់អ្នក។ ព្រោះថាចំណី(Fast food) ដែលអ្នកញ៉ាំនឹងធ្វើឲ្យអ្នកឆាប់អស់កម្លាំង មានអារម្មណ៍ល្វើយៗ និងទឹកមុខប្រែប្រួលឆាប់រហ័សដែលជាហេតុធ្វើឲ្យអ្នកមិនអាចបំពេញកិច្ចការចប់ស្រួលបួល ហើយពេលដែលអ្នកមិនអាចធ្វើវាឲ្យរួចស្រេច នោះការងារទាំងនោះនឹងកាន់តែកើនឡើងច្រើនទៅៗ ដែលនឹងធ្វើឲ្យអ្នកស្មុគស្មាញច្រើន។ដូចនេះអ្នកគប្បីញ៉ាំអាហារណាដែលមានផាសុកភាព មានជាតិបៃតង ដើម្បីទ្រទ្រង់សេរីរាងកាយរបស់អ្នកឲ្យរឹងមាំនិងស្រស់ថ្លា។
៣. គេងឲ្យបានគ្រប់គ្រាន់
ពេលដែលអ្នកគេងពុំបានគ្រប់គ្រាន់ វានឹងធ្វើឲ្យស្មារតីរបស់អ្នកធ្លាក់ចុះ ការគិតកាន់តែចុះខ្សោយ កាន់តែយឺតជាមុន ហើយផលិតភាពការងារ ឬការសិក្សារបស់អ្នកក៏ពុំទទួលបានលិទ្ធផលល្អដែរ ជាពិសេសវាថែមទាំងធ្វើឲ្យអារម្មណ៍របស់អ្នកមួម៉ៅក្ដៅក្រហាយ ឆាប់ខឹងច្រលោត ឆាប់ធុញទ្រាន់ ឬមានអារម្មណ៍រសាប់រសល់ជាដើម។ ដោយសារតែកត្តាបែបនេះហើយទើបអ្នកគួរតែសម្រាកឲ្យបានគ្រប់គ្រាន់។
៤. ចំណាយពេលហាត់ប្រាណជារៀងរាល់ថ្ងៃ
ហាត់ប្រាណរៀងរាល់ពេលព្រឹកនឹងធ្វើឲ្យអារម្មណ៍របស់អ្នកស្រស់ស្រាយ ទឹកមុខស្រស់បស់ មានថាមពលគ្រប់គ្រាន់ អាចបញ្ចេញជាតិពលពីក្នុងខ្លួនមកខាងក្រៅ និងអាចធ្វើឲ្យពេលវេលាពេញមួយថ្ងៃរបស់អ្នកទៅមុខបានយ៉ាងល្អថែមទៀតផង។ដូចនេះទោះបីជារវល់យ៉ាងណាក៏ដោយ អ្នកគួរតែឆ្លៀតធ្វើចលនាខ្លួនប្រាណឲ្យបានញឹកញាប់ ព្រោះវាអាចនឹងកាត់បន្ថយភាពតានតឹងរបស់អ្នកបាន។
ជារួមដើម្បីកាត់បន្ថយនូវភាពតានតឹងរបស់អ្នក អ្នកគប្បីហាត់ប្រាណឲ្យបានទៀងទាត់ ញ៉ាំអាហារណាដែលមានជីវជាតិ គេងឲ្យបានគ្រប់គ្រាន់ ជាពិសេសត្រូវតែមានសមភាពរវាងការងារនិងការសិក្សារបស់អ្នក។
